شعر: حمدان بن محمد
«يا أحمد»
على عيوني غَمامة حزن تمطر هموم
ولا انبتت في خفوقي غير عشب الزهَر
والحال هذا لو يْطوِّل معاي وْيدوم
أخاف يزرع بساتين وْيكوِّن نَهَر
يا سارقه من عيون المحب (حمدان) نوم
الليل رجّع علي النوم.. ليه السَهَر
ليه السَهَر دام قلبي من غلاك مْحروم
وانا في حبّك أذوب.. وْعاشق وْمنبهِر
العام كنت استلذ الشوق في كل يوم
واليوم ما غير مرّه واحده في الشهر
تروم تزعل عليّ.. لكن انا .. ما أروم
لا يمكن آزعّلك في سِر والاّ جَهَر
جمالك المحتشم خَلاّك شَخص مْحشوم
وْعفافك النادر يْزيدك في عيني طهر
مثل القمر نور وجهك في الظلام الكتوم
واذا تبسّمت مثل الشمس عند الظهر
ولو ان عمري مهر قربك أنا قبل اسوم
أنا اللي باسوق العمر لاجلك مَهَر
وْلا تصير خصمي أنا مانيب أهاب الخصوم
وشلون اهاب البشر وانا ما اهاب الدهَر
الله خلقني على الدنيا حصانِ عزوم
عسفني (محمد المكتوم) وانا مُهر
لو النجوميّه تورّث عيال النجوم
من باب حب الظهور الشخص منهم ظهَر
الشهره.. تغيّر العَالَم بوجه العموم
لكن ما غيّرت (حمدان) يوم اشتهر