فِتْنَةْ الْعِذَّالْ
يَا جِمِيْل الصَّبِرْ تَوِّيْ فِيْك تَوِّيْ
عَنْ مِكَانِكْ لا تِرُوْح وْ لا تِغَادِرْ
مَا خَلا مِنْ فِتْنَةْ الْعِذَّالْ جَوِّيْ
رَغْم تِعْدَادْ الْمِوَارِدْ وِ الْمِصَادِرْ
مَانِيْ ادْرِيْ لا عِدِمْتِكْ وِشْ أسَوِّيْ
لا بْدِرَتْ مِنْ هَبَّةْ النَّكْبَا بُوَادِرْ
ساتِرٍ دُوْن الْعَرَبْ ضَعْفِيْ وْ قُوِّيْ
فِيْك وِالاَّ الرَّاسْ مِمَّا جَاهْ سَادِرْ
الضِّعِيْف يْدَيْه تَبْغِيْ مَوْت ضَوِّيْ
وَانَا اعَرْف ايْدَيْه وَادْرِيْ وَيْن حَادِرْ
يَنْقِصَهْ شَيٍ كِثِيْر مْن التَّرَوِّيْ
لاجِلْ يِفْهَمْ وِشْ وَرَا صَفّ النِّوَادِرْ